霑哥有好o野就益人，有困難，就自己搞掂，唔鍾意麻煩朋友。兩年前音訊全無o左一輪，原來係病o左。一好翻，佢又自動出現，仲大聲過以前︰「嘩，亞Jack，個醫生真係冇得頂呀！」

唔好以為佢咁大情大性、不修邊幅。
實在霑哥博學多才，成屋都係書，中文又睇，英文又睇。佢博覽群書，融會貫通之後，就寫一
o的深入淺出，雅俗共賞o既出o黎，令好多好似我咁，文化根基唔深o既人，一樣可以領悟到，好似隨便一句「變幻原是永恆」，呢o的本來好深奧o既哲理。
對霑哥來講，無o野係太深奧，無o野係克服唔到的困難，他自己係咁，亦鼓勵別人係咁。

有次，香港大學開周年晚宴，要人上台講棟篤笑。霑哥大整蠱，自己唔上，要我上！

上台講o野，對我o黎講，簡直係大難臨頭。我同佢講，我個人又悶，又冇幽默感，唔掂喎！佢話唔駛驚︰「你翻屋企寫篇你覺得最好笑o既俾我睇下先啦。」
我寫o左，佢一睇︰「又真係Git都唔笑o番！」
跟住拿枝紅筆出o黎，成篇加o左料仲分埋段，又寫哂邊度有人會笑，邊度要停o既符號俾我，叫我翻去背十次，我仲係驚，話自己木口木面點識講笑，佢話︰「咁咪似許冠文囉！」 結果又真係俾我過到關。