蘇澤光先生致辭(廣東話原稿)

各位朋友，我係蘇澤光
首先，我要多謝各位懷念霑叔o既朋友，出席呢「黃霑博士追思會」。
我亦都要多謝霑叔o既家屬，舉辦呢個追思會。令廣大愛錫霑叔、欣賞霑叔o既市民，可以有機會向一位才華橫溢，同香港一齊成長、一齊起飛o既老朋友，表達我地o既思念，同致最後o既敬意。
霑叔，我叫佢做霑哥，佢係我中學時代o既學長，又係學校口琴隊o既隊長。
佢俾我o既第一個印象好深刻︰我口琴吹得唔好，佢同我講︰「你叻仔o黎架，俾心機呀。

我始終冇音樂天份，但係佢呢句Tum我o既說話，就鼓勵o左我一生奮鬥。

原來讚下人，係咁幫到人o既。呢樣，係我第一樣從霑哥身上學到o既o野。
之後幾十年，我有幸成為佢o既好朋友。霑哥對朋友o既態度係，「有好o野，一定預埋你。」成日話︰「亞Jack，邊度o的燒鵝靚喎！」，又或者買o左海鮮，就Call你上佢屋企食飯。
呢種「朋友開心，佢就開心」o既性格，令到霑哥可以一日到黑笑到Ka Ka聲，成為歡喜佛咁。 「要自己快樂，先令人快樂。」呢樣，係我第二樣從霑哥身上學到o既o野。